Тоқаев Мажарстан премьер-министріне: Қазақстан — сіздің атамекеніңіз

Мемлекет басшысы Қасым-Жомарт Тоқаев Қазақстанға ресми сапармен келген Мажарстан Премьер-Министрі Виктор Орбанмен кеңейтілген құрамдағы кездесу кезінде екі елдің бауырластық байланысы туралы айтты, деп хабарлайды Kazinform агенттігі. 

виктор орбан
Фото: Адлет Беремкулов/Kazinform

«Қазақстан сіздің атамекеніңіз деп айтуға болады. Себебі тамырыңыз осы жерден бастау алады. Өзіңіз қыпшақтарға өте жақынсыз. Бұл деректі қазақтар жақсы біледі. Сондықтан сізге өте ризамыз. Сіздің сапарыңыз өте маңызды. Екі ел арасындағы ынтымақтастыққа күшті серпін береді деп сенеміз. Қазақ пен мажар — ежелден сыйластығы жарасқан туыстас халықтар. Екі елдің тілі, салт-дәстүрі, мәдениеті ұқсас. Орта ғасырларда Торғай даласынан Еуропаға қоныс аударған қыпшақ тайпаларының ұрпақтары бүгінде Мажарстан аумағында өмір сүріп жатыр. Біз мұны мақтан тұтамыз. Тарихи тамырластық және тығыз байланыстар бүгінде екі ел арасындағы ынтымақтастықтың тереңдей түсуіне негіз болды. Бірлескен күш-жігеріміздің арқасында қазақ-мажар ықпалдастығы барлық салада қарқынды дамыды», — деді Мемлекет басшысы.

Қасым-Жомарт Тоқаев Қазақстан осы бауырластықты, өзара тиімді қарым-қатынасты бұдан әрі тереңдетуге мүдделі екенін атап өтті.

«Бүгінгі келіссөз екіжақты стратегиялық серіктестікті одан әрі дамытуға тың серпін береді деп сенемін», — деді Президент.

Бұған дейін Ақордада Мажарстан Премьер-Министрін қарсы алу салтанаты өткенін жазған едік. 

Еске салсақ, кеше кешке Виктор Орбанды Астана әуежайында вице-премьер Серік Жұманғарин күтіп алған болатын.

Қазақстан басшылығымен келіссөз барысында Қазақстан мен Мажарстан арасындағы сауда-экономикалық, инвестициялық және мәдени-гуманитарлық салалардағы ынтымақтастықты одан әрі тереңдету мәселелері талқыланады деп жоспарланып отыр.

Айта кету керек, Астанада Түркі мемлекеттері ұйымының Х саммиті өтеді.

Оған Әзербайжан, Қырғызстан, Түркия, Өзбекстан президенттері, бақылаушы мемлекеттер — Мажарстан мен Түрікменстан басшылары қатысады.

Соңғы жаңалықтар