Туристік көпсайыстан Қазақстан кубогі жеті кезеңінің қорытындысы бойынша БҚО жасөспірімдер құрамасы үшінші орынға шықты
ОРАЛ. 16 тамыз. ҚазАқпарат - Батысқазақстандық жас туристер Қарағанды облысы Қарқаралы ауданында өткен, Виктор Дубровскийді еске алуға арналған жаяу туризмнен ҚР біріншілігі мен туристік көпсайыстан ел кубогі кезеңінен табысты оралды.
БҚО балалар-жасөспірімдер туризмі және экология орталығынан Әсел Дүйсенованың хабарлағанындай, аталмыш жарысқа барлығы 23 команда қатысса, соның ішінде 7 ересектер, 9 жасөспірімдер, 7 балалар командалары болды. БҚО намысын «Батыс-west-2» жасөспірімдер және «Батыс-west-3» балалар командалары қорғады. «Байланыстар» және «Жеке» атты екі бірдей қашықтықта «Батыс-west-2» үшінші орынды иеленсе, «Ерлер байланысынан» жасөспірімдерден Аманер Темірбаев пен Абдислан Төлеуғалиев екінші жүлдені еншіледі. Балалар арасында Ернұр Мұрат пен Ернар Батай үшінші орынға көтерілді. «Техникалық» қашықтықта «Батыс-west-2» командасы үшінші орынды иеленді.
Туристік көпсайыстан ел кубогі жеті кезеңінің қорытындысы бойынша «Батыс-west-2» құрамасы үшінші, «Батыс-west-3» төртінші орынға шықты.
