Түркі әлемінің мәдени астанасы: Ақтауда 25 мың адам жиналатын ғаламат шоу өтеді
АСТАНА. KAZINFORM – Ертең Ақтауда Каспий теңізінің жағалауында «Ақтау — Түркі әлемінің астанасы» жылының ашылу салтанаты өтеді. Jibek Joly телеарнасының тілшісі Гүлжазира Матенова Ақтаудан тікелей көрсетілімге шығып, дайындық жұмыстары қалай жүріп жатқанын айтып берді.
Ашылу салтанаты ТҮРКСОЙ Халықаралық ұйымы, ҚР Мәдениет және ақпарат министрлігі, Маңғыстау облысының әкімдігі және Ақтау қаласының әкімдігінің қолдауымен ұйымдастырылған.
− Кешелі бері Ақтауда жаңбыр, теңіз жағасы болғандықтан жел, аздаған тұман, ызғар да бар. Бірақ қала әкімі жаңбыр шараның шырқын бұза алмайды дейді. Өйткені Наурыз мерекесінде дәл осы алаңда 12 мың көрермен осы жерде тапжылмай концерт тамашалаған екен. Ал ертең одан екі есе көп адам жиналады деп болжанып отыр. Күрделі конструкциялардан, LED-экрандардан ертең осы жерде ғаламат шоу болатыны байқалады. Ұйымдастырушылар көне мұра мен жаңа цифрлық мүмкіндіктерді ұштастырамыз деп уәде беріп отыр, - деді журналист «Bugin Live» бағдарламасында.
Ұйымдастырушылар концерт хедлайнерлерін әзірге құпия ұстап отыр. Дегенмен, бізге белгілі болғандай, гала-концертке танымал әнші Димаш Құдайберген, «Kalifarniya», Мирбек Атабековтің хедлайнер ретінде өнер көрсетеді деп жоспарланған. Сондай-ақ бағдарламада әзербайжандық әнші Роза Зергерли мен әйгілі «Ялла» тобы да бар.
Айта кетейік, осымен Қазақстанның үшінші қаласы «Түркі әлемінің мәдени астанасы» мәртебесін алып отыр. 2012 жылы Түркі әлемінің тәжін киген алғашқы қала – Астана еді, одан кейін тізімді Түркияның Ескішаһары, Ресейдің Қазан қаласы, Түрікменстанның Мары, Әзербайжанның Шеки қалалары жалғастырды.
Ал 2017 жылы мәдени шеру біздің Түркістан қаласында өтті, кейінірек Түркияның Кастамону, Бурса, Қырғызстанның Ош, Өзбекстанның Хиуа, Әзербайжанның Шуша, Түрікменстанның Әнеу қалалары мәдени астана болды.
Айта кетейік, «Ақтау – Түркі әлемінің мәдени астанасы» жобасының іс-шаралары 5 сәуірде басталып, күзге дейін жалғасады. 7-9 сәуір күндері «Түркі ырғағында би» халықаралық би байқауы, 29-мамырда «Түркі халықтарының өркениеті және оның әлемдік мәдениет тарихындағы орны» атты халықаралық ғылыми-практикалық конференция өтеді деп жоспарланған.
Одан кейін «Түркі әлемінің тотемі» халықаралық конференциясы, «Қырымның қырық батыры» жырына арналған түркі эпостарының шеру-фестивалі, «Каспий – достық теңізі» вокалды-инструменталды ансамбльдері фестивалі мен Түркі елдерінің фольклорлық ансамбльдері және аспапта орындаушыларының фестивалі болады.
Ал 15 маусымда Нұрғиса Тілендиевтің 100 жылдығына арналған «Маңғыстау мақамдары» Түркі әлемі сазгерлерінің фестивалі өтеді. XXVI «ТҮРКСОЙ опера күндері» түркі елдерінің опера жұлдыздарының фестивалі, «MODEL CUP» модельдер байқауы, «Даламен үндес – баба өнер» Түркі әлемі қолөнер шеберлерінің фестивалі және VIII «Түркі әлемі этно-мода сән көрсетілімі» жоспарланған.
Сонымен бірге, «АҚ МАЯ FEST» шұбат фестивалі, «Жұмбақ бояулар» халықаралық суретшілер мен мүсіншілер симпозиумы және XXV «ТҮРКСОЙ суретшілерінің мәжілісі», Абай Құнанбайұлының 180 жылдығы аясында жас ақындар арасындағы «Түркі шайырлары» І халықаралық поэзия фестивалі болады. «Өнерлі өрен» халықаралық балалар шығармашылығы фестивалі, «Мейірімді түркі әлемі» Халықаралық мүмкіндігі шектеулі балалардың өнер фестивалі сияқты балаларға арналған іс-шаралар, фото суретшілер фестивалі, кино және театр фестивальдері өтеді.
Ал 13-14 қараша күндері XXXXII «ТҮРКСОЙ Халықаралық ұйымына мүше елдері мәдениет министрлерінің тұрақты кеңесінің отырысы» мен «Ақтау – Түркі әлемінің мәдени астанасы - 2025» шарасының жабылу салтанаты жоспарланған.
