Түркі елдерінің сауда-өнеркәсіп палатасы қандай мәселелермен айналысады
НҰР-СҰЛТАН. ҚазАқпарат - Түркі елдерінің сауда-өнеркәсіп палатасы маңызды жобаларды жүзеге асыруға мүдделі. Бұл туралы «Атамекен» ҰКП төрағасы Абылай Мырзахметов айтты, деп хабарлайды ҚазАқпарат тілшісі.
«Түркі тілдес елдермен біздің тарихымыз, мәдениетіміз бір. Енді бұл байланысты кәсіпкерлік салада арттыру маңызды. Түркі тілдес мемлекеттерде 152 млн-ға жуық адам бар, ал жылдық ЖІӨ көлемі 1 трлн доллардан асады. Бұл үлкен нарықты дұрыс қолдана білуіміз керек», - деді Абылай Мырзахметов елордада өтіп жатқан ХІІ Астана экономикалық форумы аясында Түркі елдері сауда-өнеркәсіп палатасының Іскерлік кеңесінде.
А. Мырзахметовтің айтуынша, Түркі елдерінің сауда-өнеркәсіп палатасы ауыл шаруашылығы, жеңіл өнеркәсіп, азық-түлік бағытында кәсіпкерлік жобаларды арттыру туралы келісімге келді.
Қазіргі таңда экспортпен айналысатын қызметкерлердің кәсіптік білімін жетілдіру және кедендік бақылау жұмыстарын талаптарға сәйкес жүргізілуі туралы заңнамалық құжат әзірленуде. Сондай-ақ, «Атамекен» ҰКП түркиялық әріпестермен бірлесіп, сауда-саттықты жеңілдететін, кәсіпкерлер қызметінің ашықтығын қамтамасыз ететін ортақ мобильді қосымша құрастыруда.
Бұған дейін, Түркі елдерінің сауда-өнеркәсіп палатасын құру туралы құжат қабылданғандығы туралы хабарлаған болатынбыз.
Авторы: Ә. Асқар
