Түркістан облысында 37 тұлға пара алғаны үшін қылмыстық жауапкершілікке тартылған
ТҮРКІСТАН. ҚазАқпарат – Түркістан облысында биылғы сегіз айдың ішінде 37 тұлға пара алғаны үшін қылмыстық жауапкершілікке тартылған, деп хабарлайды ҚазАқпарат тілшісі.
Бұл туралы брифингте облыс бойынша ҚР Сыбайлас жемқорлыққа қарсы іс-қимыл агенттігінің Түркістан облысы бойынша департаментінің Жедел басқармасының басшысы Сұлтан Пірметов мәлімдеді.
Сұлтан Пірметовтың айтуынша, жыл басынан бері департаментте 72 қылмыс тіркелген. Оның 59 сыбайлас жемқорлық қылмысы болса, 31-і ауыр және аса ауыр қылмыстар санатына жатады.
«Атап айтсақ, парақорлық бойынша – 37, жүйелі қылмыстар – 2, облыстық деңгейдегі лауазымды тұлға – 2, мемлекеттік бағдарлама – 8, шағын кәсіпкерлікке заңсыз араласу бойынша – 14 құқықбұзушылық дерегі анықталған. Сыбайлас жемқорлық құқықбұзушылықтарды сотқа дейінгі тергеу бойынша сегіз айда департаменттің өндірісінде болған жалпы 254 қылмыстық істің, 172-сі өндіріспен аяқталған. 58 қылмыстық іс бойынша айыптау актісі сот қарауына жолданды», – деді Сұлтан Пірметов.
