Түркістан облысында бәйшешек гүлдеп, сарышұнақтар інінен шыға бастады

ТҮРКІСТАН. KAZINFORM — Оңтүстік өңірде көктемнің алғашқы нышаны білініп жатыр.

Әлеуметтік желіде інінен шыққан сарышұнақтардың суреті тарады. Сондай-ақ, бәйшешектің гүлдеп тұрған суреті жарияланды. Фото мен видео «Сырдария-Түркістан» мемлекеттік өңірлік табиғи паркінің аумағында түсірілген. Ал, табиғат жанашырлары бұл қалыпты құбылыс деген баға беріп отыр. 

— Бәйшешектер жыл сайын қаңтар айының ортасында гүлдеп қоятын. Биыл ақпан айының басында гүлдеп жатыр. Түнгі мезгіл салқын болғандықтан биыл кеш гүлдеді. Жалпы, қыста бәйшешектің бүр жаруы Оңтүстік табиғаты үшін қалыпты жағдай, — дейді «Сырдария-Түркістан» мемлекеттік өңірлік табиғи паркінің ғылым, ақпарат және мониторинг бөлімінің меңгерушісі Нұрила Жауынбайқызы.

Ал, сарышұнақтар биыл Шардара ауданының аумағында ерте көрінген. Табиғат қорғаушылардың сөзіне сүйенсек, облыстың басқа аймағында әлі де ұйқыдан тұрмаған.

— Жазда дұрыс семіре алмаған, май жинай алмаған сарышұнақтар күн кішкене жылынса інінен шыға береді. Күн суыса ұйықтай салады. Жалпы жануарлар көктемнің ерте келетінін сезеді. Биыл сарышұнақтар жылдағыдан аз. Дегенмен, қаңтар айының соңынан бастап ерте көктемде келетін бір-екі құс пайда болды. Бұл біздің қызығушылығымызды тудырып отыр. Сондықтан зерттеу жұмыстарын жүргізіп жатырмыз, — деді Нұрила Жауынбайқызы.

Айта кетейік, бұдан бұрын Түркістанда ағаштар бүршік ата бастағанын жазған болатынбыз.