Түркістан облысында блогер емхана басшысынан 1 млн теңге ақша бопсалаған

ТҮРКІСТАН. KAZINFORM — Келес ауданында полиция қызметкерлері медициналық мекеме басшысынан ақша бопсалады деген күдікпен блогерді қамауға алды.

Түркістан облысы Полиция департаментінің Ұйымдасқан қылмысқа қарсы күрес басқармасының қызметкерлері жедел-іздестіру іс-шаралары барысында ақша қаражатын бопсалауға күдікті 32 жастағы әйел блогерді ұстады.

Белгілі болғандай, күдікке ілінген жергілікті тұрғын блог жүргізіп, өзін қоғам белсендісі ретінде көрсеткен.

— Алдын ала мәліметтер бойынша күдікті Келес ауданындағы медициналық мекеменің басшысынан әлеуметтік желілерде беделін түсіретін сипаттағы материалдарды таратпағаны үшін 1 миллион теңге көлемінде ақшалай сыйақы талап еткен. Аталған факті бойынша қылмыстық іс қозғалды. Заттай дәлелдемелер тәркіленді, — делінген облыстық ПД хабарламасында.

Қазір оқиғаның барлық мән-жайын анықтауға бағытталған сотқа дейінгі тергеу амалдары жүргізіліп жатыр.

Бұдан бұрын Түркістан облысында кәсіпкерді бопсалаған блогер ұсталғанын жазған едік.