Түркістан облысында халықаралық іздеуде жүрген күдікті ұсталды

ТҮРКІСТАН. KAZINFORM — Smart камера күдіктіні бірден таныған.

Түркістан облысы полиция департаменті криминалдық полиция басқармасының қызметкерлері жедел-іздестіру іс-шаралары барысында алты жыл бойы халықаралық іздеуде жүрген 40 жастағы ер адамды ұстады. Ол есірткіні заңсыз сатумен байланысты қылмыс жасағаны үшін 2019 жылдан бері іздеуде болған. Адамның бетін тану функциясы бар «FaceID» smart камерасы күдіктіні бірден таныған. Содан полиция қызметкерлері жедел әрекет етіп, қолға түсірді.

— Қазіргі уақытта полиция жедел-тергеу іс-шараларын жалғастыруда. Ұсталған ер адам уақытша ұстау изоляторына қамалды. Болған оқиғаның барлық мән-жайлары анықталуда, — делінген Түркістан облысы полиция департаментінің баспасөз қызметі ұсынған ақпаратта.

Айта кетейік, жыл басынан бері Түркістан облысының полицейлері іздеуде жүрген 22 қылмыскерді, оның ішінде халықаралық іздеуде жүрген 10 адамды анықтап ұстады.

Еске салайық, бұдан бұрын Түркістан облысында кәмелетке толмаған қызды зорлаған күдікті қамауға алынғанын жазған болатынбыз.