Түркістан облысында қанша мектепте спорт залы мен асхана жоқ

ТҮРКІСТАН. KAZINFORM — Өңірде математика, физика, ағылшын және орыс тілі пәнінің мұғалімдері жетіспейді. 

Түркістан облысындағы 126 мектепте бүгінгі таңда спорт зал жоқ. Облыстық білім басқармасы ұсынған ақпаратқа сүйенсек, спорт залы жоқ мектептер шалғай ауылдық елді мекендерде орналасқан.

Олардың ғимараты ыңғайластырылып саман қыштан соғылған. Сондай-ақ, шалғай ауылдарда орналасқан бала саны 30-ға дейінгі шағын жинақты 47 мектепте асхана жоқ.

Жергілікті жауапты мамандар асхана мен спорт залдардың мәселесі жаңа мектептердің құрылысымен шешілетіндігін айтып отыр. 

Сондай-ақ, өңір мектептерінде бүгінгі күні 27 бос мұғалім орны бар. 

Мәселен, қазақ тілі және әдебиетінен — 1, орыс тілі және әдебиетінен — 3, ағылшын тілінен — 3, физикадан — 3, математикадан — 7, химиядан — 1, тарихтан — 1, бейнелеуден — 1, бастауыш сыныптан — 5 және басқа пәндер бойынша 2 маман қажет. 

Сонымен қатар, жалпы білім беретін 53 мекеме басшысының орны бос. 

— Түркістан облысында жылдан жылға резервшілер саны артып келеді. 2023 жылы резервте 26 адам болса, 2024 жылы бұл көрсеткіш 43-ке артып отыр. 2023 жылы есепке алынған 26 резервшінің 24-і жұмысқа орналасты. Ал, 2024 жылы тіркелген 43 резервшінің 22 тағайындалды. Қалған резервшілер отбасына байланысты, зейнет жасқа толып кететін бос лауазымға үміткер болуды жоспарлап отыр. Биыл «Білім берудегі өзгерістің 1000 көшбасшысы» бағдарламасы аясында 10 ақпан мен 10 наурыз аралығында конкурс жарияланып, 477 үміткер тіркелді, — делінген басқарма ақпаратында.

Айта кетейік, бұдан бұрын Түркістан облысында аттестаттаудан өтпеген 1 мектеп пен 2 балабақша жабылғанын жазған болатынбыз.