Уақыт белдеуін зерттеуге 160 млн теңге жұмсалмақ

АСТАНА. KAZINFORM – Ғылым және жоғары білім министрі Саясат Нұрбек уақыт белдеуін өзгертудің халық өміріне әсерін зерттеуге қанша қаражат кететінін айтты.

«Үш жылдық зерттеуге өтінім келіп түсті. Бюджеті – 160 млн теңге. Ал шын жағдайда 90-100 млн теңге кететін шығар деп ойлаймын. Өйткені біз конкурс жариялаймыз. Кеше жоғары ғылыми-техникалық комиссияның отырысы өтті. Конкурс жариялаймыз. Ұлттық ғылыми кеңес зерттеудің нақты құнын анықтайды», - деді ол Мәжіліс отырысынан кейін журналистердің сұрағына берген жауабында.

Министр зерттеуге өз министрлігі қай тұрғыдан атсалысатынын айтты.

«Зерттеудің алгоритмін, егжей-тегжейін білмеймін. Бірақ география, зоология институттары қатысады», - деді Саясат Нұрбек.

Айта кетейік, Сауда және интеграция министрі Арман Шаққалиев уақыт белдеуін қайта қарау туралы ұсыныстарға жауап берген болатын.