UFC үміткері Бекзат Алмахан бразилиялық Матеус Глорияны нокаутқа түсірді
АСТАНА. ҚазАқпарат - Аралас жекпе-жектен қазақстандық спортшы Бекзат Алмахан (15-1) Алматыда өтіп жатқан «Октагон 47» турнирінің кешіндегі басты кездесуде өнер көрсетті, деп хабарлайды ҚазАқпарат Sports.kz сайтына сілтеме жасап.
Ең жеңіл салмақтағы жекпе-жекте қазақстандық боксшы сегізбұрышта бразилиялық спортшы Матеус Глориямен (12-4-1) кездесті. Екінші раундтың басында-ақ Бекзат бразилиялық боксшыны басынан теуіп (хайкик) нокаутқа түсіріп, мансабындағы 16-шы жеңісіне қол жеткізді.
Айта кетейік, соңғы жекпе-жегінде UFC-ге түсуге үміткер Алмахан аргентиналық Мауро Мастромариниден басым түскен UAE Warriors промоутерлік жекпе-жегінде жеңіске жеткен болатын.
