Үкімет қаулысымен 2014 жылғы 1 қаңтардан бастап зейнетақы төлемдерінің мөлшері тоғыз пайызға арттырылды

АСТАНА. 27 желтоқсан. ҚазАқпарат - ҚР Үкіметінің 2013 жылғы 26 желтоқсандағы №1403 қаулысымен 2014 жылдың 1 қаңтарынан бастап уәкілетті ұйымнан төленетін зейнетақы мөлшері көтерілді.

***

Қазақстан Республикасы Үкіметінің қаулысы №1403

«Қазақстан Республикасында зейнетақымен қамсыздандыру туралы» 2013 жылғы 21 маусымдағы Қазақстан Республика­сы­ның Заңы 4-бабының 3-тармағына сәйкес Қазақстан Республикасының Үкіметі қаулы етеді:

1. 2014 жылғы 1 қаңтардан бастап уәкілетті ұйымнан төленетін 2014 жылдың 1 қаңтарына дейін тағайындалған зейнетақы төлемдерін 1998 жылғы 1 қаңтарға дейін зейнетақы алатын, зейнеткерлік жасқа толған Қазақстан Республикасының азаматтарына, әскери қызметшілерге, арнаулы мемлекеттік және құқық қорғау органдарының арнаулы атақтар, сыныптық шендер берілген қызметкерлеріне, сондай-ақ арнаулы атақтар, сыныптық шендер алу және нысанды киім киіп жүру құқықтары 2012 жылғы 1 қаңтардан бастап жойылған, еңбек сіңірген жылдары үшін зейнетақы төлемдерін алуға құқығы бар адамдарға алатын зейнетақы төлемдерінің мөлшерінен тоғыз пайызға арттыру жүргізілсін.

2. Осы қаулы 2014 жылғы 1 қаңтардан бастап қолданысқа енгізіледі және ресми жариялануға тиіс.

Қазақстан Республикасының Премьер-Министрі С.АХМЕТОВ.