Үкімет бүгін экономиканың 6 айдағы нақты нәтижесін талқылайды
АСТАНА. KAZINFORM – Бүгінгі Үкімет отырысында қаңтар-маусым аралығындағы әлеуметтік-экономикалық даму көрсеткіштері қорытындыланып, республикалық бюджеттің атқарылу барысы қаралады.
- Отырыс қорытындысы бойынша Үкімет басшылығының қатысуымен баспасөз конференциясы өтеді, - деп жазылған баспасөз-анонста.
Үкімет отырысы PrimeMinister.kz сайтында, YouTube ресми арнасында, Facebook әлеуметтік желісінде, сондай-ақ UKIMET Telegram-каналында тікелей көрсетіледі. Баспасөз конференциясы да YouTube ресми арнасында және Facebook әлеуметтік желісінде трансляцияланады.
Айта кету керек, шілде басында Премьер-Министр Олжас Бектенов Мемлекет басшысы Қасым-Жомарт Тоқаевқа ел экономикасын әртараптандырып, инфрақұрылымды жаңғырту бағытында қабылданып жатқан шаралар туралы есеп берген болатын.
Айтуынша, қазір ел аумағында жалпы инвестиция көлемі 2,3 триллион теңгеден асатын әрі шамамен 20 мың жұмыс орнын құруды көздейтін 45 ірі өнеркәсіптік жоба іске асырылып жатыр.
Сондай-ақ ол егіс басындағыларға суды уақтылы жеткізу жұмыстары бақылауға алынғанын мәлім етті. Сол үшін облыстарда өңірлік штабтар жұмыс істеп жатыр.
Президентке егіс науқанының аяқталуы мен жиын-терім жұмыстарына дайындық барысы баяндалды. Биыл республика бойынша 23,7 миллион гектар алқапқа егін егілген. Жыл басынан бері ауыл, орман және балық шаруашылығындағы өнімдер мен қызметтердің жалпы көлемі 4 пайыз өскен.
Үкімет басшысы Президентке энергетикалық және коммуналдық инфрақұрылымды жаңғырту, цифрлық трансформациялау жөнінде ақпарат ұсынды.
Кездесу соңында Қасым-Жомарт Тоқаев экономикада институционалдық өзгерістер жасауға, өңірлерді дамытуға және инвестиция тартуға қатысты бірқатар тапсырма берген болатын.
Ұлттық статистика бюросының алдын ала деректері бойынша қаңтар–сәуір аралығында елдің нақты жалпы ішкі өнімі 6% өскен. Бұл көрсеткіш қаңтар–наурыздағы (5,6%) өсімнен жоғары және өткен жылдың сәйкес кезеңімен салыстырғанда (3,4%) екі есе жуық артық.
Оның ішінде тауар өндіру көлемі 7,5%-ға артып, экономиканың негізгі қозғаушы күшіне айналды. Өнеркәсіп өндірісі 6,4%-ға өсті, оның ішінде өңдеу өнеркәсібінің өсімі — 7,2%.
Өндірісі артқан өнімдер қатарында күнбағыс майы, ұн, қант, күріш, табиғи уран, бензин, дизель отыны, тауарлық бетон, тыңайтқыштар, болат, шойын, жалпақ прокат, жүк вагондары, дизель және теміржол локомотивтері бар.
Тау-кен өнеркәсібінің өсімі 7,1%-ға жетті (бірінші тоқсанда — 6,1%), бұл мұнай өндірудің (8,8%), көмірдің (11,2%) және металл рудаларының (1,4%) ұлғаюымен байланысты.
Ал маусым айының аяғында Парламент палаталарының бірлескен отырысы өтіп, Үкімет пен Жоғары аудиторлық палатаның 2024 жылғы республикалық бюджеттің атқарылуы туралы есептері бекітілген еді.
