Үлбі металлургиялық зауыты аумағында уранның шикізат қоры сақталған

ӨСКЕМЕН. KAZINFORM – Үлбі металлургиялық зауыты аумағында төмен уран банкі орналасқан. 

Халықаралық атом энергиясы агенттігінің төмен байытылған уран банкі Үлбі металлургиялық зауытының аумағында орналасқан. МАГАТЭ-нің тікелей бақылауындағы бұл банкте уран гексафториді түріндегі төмен байытылған уранның, яғни ядролық отынды өндіретін шикізат қоры сақталған.

«2019 жылдың 10 желтоқсанында банк ресми түрде пайдалануға берілді. Компанияны басқаруға жарияланған ашық тендердің жеңімпазы болып «Қазатомөнеркәсіп» ҰАК» АҚ және француздық Orano Cycle компаниясы танылды. Қордағы төмен байытылған уранның көлемі – 90 тонна. Банктің жұмысы басталғалы бері осы уақытқа дейін бұл қордағы уран қолданылып көрген емес», - дейді Юлия Антонова.

Егер өнім жеткізуде қандай да бір кедергілер болып жатса, МАГАТЭ-ге мүше мемлекеттер банкте сақталған кепілдік берілген резервті пайдалана алады.

Еске сала кетейік, бұған дейін Өскемендегі Үлбі металлургиялық зауытында АЭС-ке қажетті отын таблеткалары шығарылатынын жазған болатынбыз.