Үлкен Алматы көліне баратын жол тағы жабылды

  Үлкен Алматы көліне баратын автокөлік жолы жабылды, деп хабарлайды ҚазАқпарат тілшісі.

«ҚазАвтоЖол» АҚ мәліметінше, жол қозғалысына қатысушылардың қауіпсіздігін қамтамасыз ету, тәртіп пен тазалықты сақтау мақсатында Үлкен Алматы көліне баратын республикалық маңызы бар Р-22 «Алматы-Космостанция» автожолында (15-34 шақырым) көлік қозғалысына шектеу енгізілді.

«Қызметтік міндеттерін орындау үшін жүріп өтуге тек Ұлттық саябақ қызметі, шекара заставасы, «Космостанция» ғылыми базасы, метеорологиялық және гидрологиялық қызметтерге рұқсат етіледі (бекітілген тізімге сәйкес және тек қызметтік автокөлікпен)», - «ҚазАвтоЖол» АҚ баспасөз қызметі.

Еске салайық, 2020 - 2023 жылдар аралығында Үлкен Алматыға баратын жол жабық болған. Биыл жол ашылған кезде экологтар Үлкен Алматы көліне баратын жолды қайта жауып, туристерді тек экологиялық көлікпен апаруды ұсынған еді.