Ұлт Жоспары - даму көкжиегін айқындауда

АСТАНА. ҚазАқпарат - Қазақ мемлекеттік қыздар педагогикалық университетінде Мемлекет басшысының халықтық реформасында көрсетілген 100 қадамды жүзеге асыруға байланысты «Елбасы ұсынған 5 институционалды реформа - ел бірлігін бекемдеп, тұрақтылықты нығайту» тақырыбында республикалық конференция болып өтті.

Конференция жұмысын ашқан оқу орны­ның басшысы Динар Нөкетаева Елбасы ұсынған халықтық 5 реформаның маңызы мен мәніне тоқталып өтті. «Бүтін ел болып мемлекетіміздің жарқын болашағы үшін үлкен іске қызу кірісіп, білім мен ғылым саласы бойынша өзіміздің сүбелі үлесімізді қосуға барынша ниеттіміз. Себебі Елбасы Н.Ә.Назарбаев еліміз үшін әлемдік дағдарысқа біртұтас күресуде баламасы жоқ, дәлелі тұжырымды, ұстанымы кесімді 5 халықтық бағыттан тұратын Ұлт Жоспарын жариялады. Бұл - тәуелсіздіктің аз ғана жылында көптеген мемлекеттер жете алмаған биік белестерді еңсерген Қазақстанның әлемнің алдыңғы қатарлы 30 елінің қатарына қосылу үшін жасалған ғасырлық межесі. Ұлттық жоспар - ұлт пен ұлыстарды ұйыстыратын, біріккен саусақ пен иліккен иненің көзінен өтетін өткір де ұтқыр идеяға құрылған ортақ іс екеніне ешкімнің шүбәсі жоқ. Ондағы көрсетілген 100 қадам - Көк Туымыздағы тармақталған сәуле секілді әр тарапқа нұрын төккен Мәңгілік Елдің аспандаған адымы. Нұрсұлтан Назарбаевтың Нұрлы жолы, мәңгілік тақырыпқа құрылған нақты идеясы», деді Д.Нөкетаева.

Одан әрі сөз алған, ел егемендігін жария­ла­ған кезде басы-қасында болған ­академик, ҚР еңбек сіңірген қайраткері Сұлтан ­Сартаев Ел­басы­ның тәуелсіздік алған жылдан бергі елі­міздің дамуына қосқан үлесін, көшбасшылық Тұң­ғыш Президенттің сарабдал саясатын тілге тиек етті. Ел руханиятының қалыптасуына елеулі еңбек сіңірген белгілі ғалым, ҚР ҰҒА ака­демигі Әбдімәлік Нысанбаев жаңа ұлттық жоспардың көкжиегі кең, маңызы мен нәтижесі орасан зор екендігін атап өтіп, Елбасының реформалық бағ­дары және оның орындалу жолындағы тия­нақты 100 қадамы еліміздің өсіп-өркендеу жо­лы­на, көркейіп, дамуына апаратынына сенім білдірді. Танымал тіл жанашыры, «Мемлекеттік тілге - құрмет» қоғамдық бірлестігінің тө­райымы Асылы Осман жиында: «Мем­ле­кет­тік тіл ортақ болмай қоғам топтаспайды. Үш­тұ­ғырлы тіл саясаты дегенде қазақ, орыс, ағыл­­шын тілдерін білу керек. Ағылшын мен орыс тілі тұғырына қонған тілдер. Алаш қайраткері А.Байтұрсынұлы «Сөзі жоғал­­­ған жұрттың өзі де жоғалады» деген, сон­дықтан да біз үштілділік саясатында қазақ тіліне мән беруіміз керек» деп қадап айтып, мемлекеттік тілді дамытуда, қоғам бір­тұтастығын сақтауда Елбасының 5 ре­фор­ма­­сының шынайы халықтық екендігін жеткізді. Конференцияда «Кәсіби мемлекеттік аппарат - саяси жүйенің негізгі тұрақтандыру факторы», «Заңның үстемдігі - заманауи қоғамның теңдесіз жетістігі», «Индустрия­ландыру және экономикалық өсім - ел дамуының негізгі бағыты», «Біздің ел, біздің ұлт, біздің болашақ» атты 4 секция жұмыс істеп, ғалымдар арнайы баяндама жасады. Шара соңында бес халықтық реформаны жүзеге асыру тетіктері мен оны түсіндіру бағытында арнайы қарар қабылданды. Конференцияда ең қымбат қазынасы адам болып саналатын Баршаға бірдей осы заманғы мемлекет, Заңның үстемдігі, Тұрақты экономика, Мызғымас, мәңгілік Болашағы біртұтас ұлт, Ашық мемлекет құрудағы білім мен ғылым салаларының атқаратын рөлі, қосатын үлесі белгіленді.