Ұлттық лигадағы әйелдер командалары арасындағы ел чемпионатының 1-турында алматылықтар алғашқы жеңісіне қол жеткізді

21 қараша күні «астаналық» құрбыларына 0:3 есебімен ойсырай ұтылған олар кеше Теміртаудың «Металлург АМТ» волейболшыларынан дәл осындай есеппен басым түсті. Қазір алғашқы 3 күннің қорытындысы бойынша турнир кестесінде 9 ұпаймен астаналықтар көш бастап келе жатыр. Олар «Алматы», «Металлург АМТ» және Өскеменнің «Шығыс-ҚорғасынҚұрылыс» командаларын 3:0 есебімен тізе бүктірді. Ал бірнеше жылдан бері ел чемпионатында топ жарып жүрген Алматы облысының «Жетісуы» кеше Қарағанды облысының («Қарағанды») волейболшыларын 3:0, ал арғы күні Павлодар облысының («Ертіс-Қазхром») спортшыларынан 3:1 есебімен басым түскен болатын.
Бүгін енді жарыс кестесіне сәйкес барлық командалар тынығуда. Ертең «Ертіс-Қазхром» мен «Қарағанды», «Жетісу» мен «Астана», «Шығыс-ҚорғасынҚұрылыс» пен «Алматы» өзара күш сынасады. Егер жетісулықтар бұл сында өз басымдығын дәлелдей алса, турнир кестесінде көшбасшылық тізгінді өз қолына алатын болады. Өйткені олар бұдан кейінгі ойындарын 2010/2011 жылғы маусымда 5-7 орынды бөліскен Алматы, Теміртау және Өскемен қалаларының командаларымен өткізеді. Олар қазірдің өзінде биылғы чемпионаттың күміс жүлдегері саналатын павлодарлықтар мен онда үздік төрттікті түйіндеген қарағандылықтардан өз шеберлігінің жоғары екенін дәлелдей алды.