Үндістанның солтүстік-шығысында ток соғып, 15 адам мерт болды
АСТАНА. Мамырдың 14-і. ҚазАқпарат - Үндістанның солтүстік-шығысындағы Бихар штатында бейсенбі күні ток соғып, 15 адам қаза тапты.
Тағы 10 адам жарақат алды, деп хабарлады ИТАР-ТАСС жергілікті полиция өкілдеріне сілтеме жасап.
Кейіннен анықталғандай, 50-ге жуық адам мінген жүк көлігінің үстіне үзілген электр сымы құлап кеткен.
Құқық қорғау органдарынан хабарлағандай, қазір осынау қайғылы оқиғаға әкелген себептерді анықтау жөніндегі тергеу амалдары жүргізіліп жатыр.
