Волейболдан Қазақстан чемпионаты: Оралда плей-офф бәсекелері басталады

ОРАЛ. KAZINFORM — Бүгін Оралдағы «Жайық арена» спорт кешенінде волейболдан ерлердің ұлттық лига командалары арасында XXXIII Қазақстан чемпионаты плей-офф кезеңінің бастапқы матчтары өтеді.

Алаңға бірінші болып А тобынан «Павлодар» мен «Тараз» командалары шығады.

Павлодарлықтар 2023 жылы ел чемпионы атанса, «Тараз» былтыр үздік шыққан еді. Өткен жылы «Павлодар» күміс алса, «Есіл» үздік үштікті түйіндеген болатын. 

Осы маусым барысында павлодарлықтар тараздықтарды үш рет жеңген еді. Бұл жолы қалай болатынын ойын көрсетеді. А тобында сондай-ақ «Жетісу» (Талдықорған) бақ сынайды. 

Топ жеңімпазы жартылай финалда 2024 жылғы кубок пен суперкубок иегері, тұрақты чемпионатты екінші орынмен түйіндеген «Ақтөбе» командасымен (бас бапкері Сергей Трикоз) кездеседі. 

Біріншілікті көш басында аяқтаған Виктор Козик жаттықтыратын «Жайық» клубы өз алаңында жартылай финалда Б тобында үздік шыққан командамен сынға түседі. Бұл топта «Буревестник» (Алматы), «Атырау» және «Есіл» (СҚО) бақ сынайды. 

Бүгін «Атырау» мен «Есіл» өзара шеберлік байқасады. 

Бір жарым аптадан соң, 2 немесе 3 сәуірде биылғы Қазақстан чемпионы анықталады. 

Еске сала кетейік, бұдан бұрын «Тараз» командасының волейболдан Қазақстан чемпионы болғанын жазған болатынбыз.

Сондай-ақ бапкер волейбол деңгейін көтеру үшін туған жеріне оралғанын айтты.