«Яндекс» жаңалықтарды роботтар жазатын өз ақпараттық агенттігін ашады

АСТАНА. ҚазАқпарат - Қарашада ресейлік «Яндекс» компаниясы ақпараттық агенттігін ашпақ, онда хабарламаларды компьютерлік алгоритмдер шығарады, деп хабарлады «Ведомости» басылымына «Яндекс медиа үшін» жобасының жетекшісі Мария Петрова.

Оның айтуынша, ақпараттық агенттік әуелі жолдағы жағдай және ауа райы туралы автоматты түрде жасалған хабарламаларды жариялайды, сондай-ақ кеңінен таралған оқиғалар мен тақырыптардың дайджестілерін құрастырады. Болашақта тақырыптар аясы кеңейе түспек.

Мәліметтер тегін форматта ұсынылады: телеарналар дайын графикаларды алып отырады, радиостансалар - мәтінді арнайы интерфейсті пайдаланады, ал ақпараттық агенттіктер, баспа құралдары және интернет-басылымдар хабарламалар таспасын алатын болады.

Тақырыптық жаңалықтарды жазудың автоматтандырылған алгоритмінің танымал үлгісі - Automated Insights компаниясының Wordsmith платформасы, оны Associated Press агенттігі мен Yahoo News сервисі пайдаланып отыр.