Юлия Путинцева әлемдік рейтингіде ТОП-20-ға қайта кірді

ОРАЛ. KAZINFORM – Әйелдер теннисі қауымдастығы (WTA) жекелей және жұптық сында жаңартылған рейтингіні жария етті. 

Әбу-Даби WTA 500 турнирінде чемпиондық атағын қорғай алмаған Елена Рыбакина 5-тен 7-орынға сырғыды.

Есесіне 21-ден 20-сатыға көтерілген Юлия Путинцева өзінің үздік көрсеткішін қайталап тұр.

Жібек Құламбаева 320-дан 318-ге, Зарина Дияс 353-тен 336-ға көтерілді.

Үздік үштікте ештеңе өзгере қойған жоқ: Белорусь өкілі Арина Соболенко көш бастаса, польшалық теннисші Ига Швентек екінші, америкалық спортшы Кори Гауфф үшінші сатыда тұр. 

Жұптық сында Анна Данилина – 19, Юлия Путинцева – 107, Жібек Құламбаева 160-орнын сақтап қалды. 

Путинцева бүгін Доха (Қатар) WTA 1 000 турнирінің алғашқы айналымында әлемнің 63-ракеткасы, жапониялық Моюка Учижимамен кездеседі.

Өткен аптаның қорытындысы бойынша WTA чемпиондық кестесінде Рыбакина 585 ұпаймен 19-дан 7-сатыға жоғарыласа, Путинцева (386 ұпай) 20-дан 25-ке төмендеді.

Еске сала кетейік, бұдан бұрын теннистен Доха турнирінде Рыбакина мен Путинцева өнер көрсететінін жазған едік.