Заңсыз көші-қон үшін ҚР-дың Үндістандағы бұрынғы консулынан 27 миллион теңге өндірілді
АЛМАТЫ. ҚазАқпарат - Алматыда, Алмалы аудандық сотында Үндістандағы бұрынғы ҚР консулы Рашид Рахымбековке үкім шығарылды, деп хабарлады Алматы қаласының сот әкімшілігі ақпаратпен қамтамасыз ету бөлімінің жетекшісі міндетін орындаушы Бауыржан Ахметов.
«Сот үкімімен 8.08.2016 жылы Рахымбеков Рашид Тауфықұлы ҚР ҚК 394 бабы, 2 бөлімі бойынша қылмыс жасады деп танылды. Оған 1 жыл, 6 айға бас бостандығынан айыру және 1 жыл, 6 ай пробациялық бақылау түріндегі жаза тағайындалды. Аталған мерзім ішінде мекен-жайын ауыстыруға, пробация қызметіне ескертпей, өзге жаққа кетуге тыйым салынады. Одан бөлек, мемлекет пайдасына 26 787 551 теңге өндірілді», - деп атап өтті Б.Ахметов.
Рашид Рахымбеков 2010-2013 жылдары ҚР Үндістандағы консулы болып қызмет еткен.
Бұрынғы консул заңсыз көші-қонды ұйымдастырды және мемлекет қазынасына материалдық шығын келтірді деп айыпталуда.
