Жамбыл облысында жол апатынан дәрігер қаза тапты, облыстық денсаулық сақтау басқармасының басшысы ауыр жарақаттанды
ТАРАЗ. 5 қараша. ҚазАқпарат - Жамбыл облысының тасжолында болған жол апатында уролог-дәрігер қаза тауып, облыстық денсаулық сақтау басқармасының басшысы және оның сіңлілері жарақаттанды.
Жамбыл облысы ІІД баспасөз қызметінде хабарланғандай, Меркі ауданында республикалық маңызы бар «Алматы - Ташкент» автокөлік жолының 293 шақырымында Меркі және Қордай ауылдарының арасында 59 жастағы жүргізуші айдап келе жатқан «Мерседес Бенц-320 Е» көлігі аударылып қалды, көлік салонында үш әйел отырған. Жеңіл автокөлік Меркі ауылынан келе жатқан. Апатқа техникалық ақаулар, сондай-ақ, тұман себеп болуы мүмкін.
Қаза тапқан адам - облыста танымал уролог-дәрігер Еркін Қуанышәлиев, оның жүргізушілік стажы - 25 жыл. Оның жұбайы - облыстық денсаулық сақтау басқармасының басшысы Салтанат Омарбекова және оның екі сіңлісі ауыр зақым алды. Зардап шеккендер Меркі ауылының орталық аудандық ауруханасына жеткізілді.
Аталған факті бойынша ҚР ҚК 296-бабы («Жол жүру ережелерін бұзу») бойынша қылмыстық іс қозғалды. ЖКО-ның шынайы себебін анықтау жөнінде тергеуалды тексеру жүргізілуде. Бірқатар сот сараптамасы тағайындалды, деп хабарлайды Жамбыл облысы ІІД баспасөз қызметінен.
