«Жаңа адамдар» Алматы дүкендеріндегі жарамсыз өніммен күресіп жатыр
АСТАНА. KAZINFORM – Кез келген азық-түлік дүкенінде мерзімі өткен тауарлар болатыны анық. Өкінішке қарай, кейбір дүкен иелері бұған бас қатырмай, сөрелерге бүлінген өнімдер қойылып жатады. Бұл ретте, «Жаңа адамдар» қозғалысының белсенділері мұндай олқылықтардың алдын алу мақсатында арнайы жобаларды жүзеге асырып жатыр.
Атап айтсақ, белсенділер «Время истекло» жобасы шеңберінде азық-түлік дүкендерін тексеріп, мерзімі өткен тауарларды анықтауға кіріскен.
Жобаның белсенді өкілдерінің бірі Бекарыс Шаменнің айтуынша, кейбір тұтынушылардың сатушыға жарамсыз тауар туралы ескертуге, тіпті, бұл заңсыздық туралы тиісті органдарға хабарлауға батылы бара бермейді,. Ал мерзімі өткен тауарлар тұтынушылардың денсаулығына кері әсерін тигізуі әбден мүмкін.
«Дүкендерде жарамсыз өнімге тап болсаңыз, құзырлы органдарға хабарлаңыз. «Время истекло» жобасы дүкендерді тексеріп, қауіпті азық-түлік өнімдерінің сатылымнан алынуын немесе жойылуын қамтамасыз етеді. Мерзімі өткен тауардың сатылуы қалыпты жағдайға айналмасын!» - деді белсенді.
Белсенділер жоба шеңберінде Қарасай батыр көшесі, 119 к1 мекен-жайында орналасқан «Наурыз маркет» дүкенінде болып, бүлінген өнімдерді арбаға жинады.
Аталған дүкенде жарамдылық мерзімі өткен тауарлардың сатылуы бірінші рет тіркеліп отырған жоқ. Алғашқыда дүкен басшылығы жағдайды түзетуге уәде берген болатын. Қайта тексеру кезінде белсенділер оның өз сөзінде тұрмағанына көз жеткізген. Сорақысы сол, шіріген шұжық, көгерген нан, қышқыл сүт өнімдері «Наурыз маркет» сөрелеріне қойылған.
«Жаңа адамдар» қозғалысының белсенділері алдағы уақытта тұтынушылардың құқығын қорғау мақсатында мұндай жобалар жалғасын табатынын алға тартып отыр.
