Жаңа алтын айыру фабрикасы 2010 жылдың екінші жартысында толық жобалық қуатына шығады

АҚМОЛА ОБЛЫСЫ. Мамырдың 28-і. ҚазАқпарат /Расул Бахамов/ - Жаңа алтын айыру фабрикасы 2010 жылдың екінші жартысында толық жобалық қуатына шығады, деп хабарлады «Васильков кен байыту комбинаты» АҚ-ының бірінші вице-президенті Аңсат Жабағин.

Алтын айыру фабрикасын іске қосу рәсімінде осындай мәлімдеме жасаған ол, ағымдағы жылы 6-8 тонна алтын өндіру пайымдалып отырғандығын айтты.

Естеріңізге сала кетейік, бүгін Елбасы Нұрсұлтан Назарбаев игеріліп жатқан карьерде, сондай-ақ Васильков кен байыту комбинатының бас комбинатында болды және жаңа алтын айыру желісін іске қосты.

Бұдан бұрын айтып өткеніміздей, алтын айыру фабрикасының жылдық өндіру қуаты 8 миллион тонна руданы және 13-14,5 тонна алтынды құрайды. Бұл өндірісті құруға 700 миллион доллар көлемінде инвестиция салынды.

Мамандардың айтуынша, ТМД кеңістігінде жылына 7 миллион тонна руда өңдейтін фабрика жоқ.