Жаңа министр Нұрлан Байбазаров ұлттық экономиканы қалай реформалайтынын айтты

АСТАНА. KAZINFORM – Премьер-Министрдің орынбасары – Ұлттық экономика министрі Нұрлан Байбазаров Үкіметтің кеңейтілген отырысынан кейін БАҚ өкілдерінің сұрағына берген жауабында ұлттық экономиканы қалай реформалайтынын айтты. 

«Мемлекет басшысы «жаңа экономикалық саясат» бағдарының негізінде жаңа бағыттарды белгіледі. Оның бәрі еліміздің әлеуметтік-экономикалық даму бағыттары. Соған байланысты екі негізгі бағытты айтуға болады – экономикадағы құрылымды өзгерістер және экономика салаларындағы реформалар. Оның бәрі инвестицияларды тарту, салық және бюджет жүйесіне әсер етеді», - деді Нұрлан Байбазаров. 

«Сонда сізге дейінгі министрдің қолынан бұл келмеген бе?» - деп сұрады журналист. Жаңа министр ондай пайыммен келіспейтінін айтты.

«Ол жұмыстар басталған, енді оны дұрыстап аяқтап, жаңа экономикалық өсімге жағдай жасау қажет», - деді Ұлттық экономика министрі.