Жаңа рекорд: Әлем чемпионатында 20 пенальти белгіленді
АСТАНА. ҚазАқпарат - 2018 жылғы Әлем чемпионатының топтық кезеңіндегі Иран мен Португалия арасындағы матчта екі пенальти белгіленді, деп хабарлайды «SPORTINFORM» САА.
Арбитр Энрике Касерес бейнебақылау жүйесін пайдаланып, Иранның пайдасына қарай, Португалияға 11 метрлік айып добын белгіледі. Бұл - турнирдегі жиырмасыншы пенальти. Бұған дейін Криштиану Роналду он тоғызыншы пенальтиді орындай алмаған болатын.
Әлем чемпионаттарының тарихында осынша көп пенальти ешқашан болмаған. Белгіленген пенальтилер бойынша бұған дейін жасалған рекорд - 18. Бұл 1990, 1998 және 2002 жылғы Әлем чемпионаттарында болған. 2018 жылғы Әлем чемпионатында алғаш рет төрешілерге ойындағы даулы мәселелерді шешу үшін мүмкіндік беретін бейнебақылау жүйелері іске қосылды.
