Жаңаөзен қаласында референдум қалай өтіп жатыр
АҚТАУ. KAZINFORM – Шаһарда 81 мыңнан астам дауыс беруші бар. Таңнан бері 30 мыңға жуық тұрғын референдумға қатысып, таңдау жасады.
Референдум учаскелеріне спортшы да, актер де, әнші де келіп, дауыс беруде. Солардың бірі Париж Паралимпиадасының қатысушысы Сейдов Құралбек те өз таңдауын жасады.
– Өз елінің нағыз патриоты мұндай маңызды шарадан шет қалмаулары тиіс. Себебі, халық таңдауымен таразыланатын бұл сында қоғамның пікіріне құлақ асып, таңдау жасауға мүмкіндік берілді. Сондықтан әрбіріміздің дауысымыз маңызды, - дейді «Алға» мүгедектер спорт клубының жетекшісі Құралбек Сейдов.
Құрық ауылының тұрғыны, 90 жастағы геолог та таңдауын жасады. Қазақстан Республикасы жер қойнауының құрметті барлаушысы, Маңғыстау облысының құрметті азаматы Тұрсынғали Көшенов Құрық ауылындағы №145 референдум учаскесінде дауыс берді.
– Референдум деген – елдік шаруа. Қасым-Жомарт Тоқаев президенттікке келгелі бері елімізде екінші рет референдум өтіп отыр. Бұл – ел тағдырына қатысты мәселеде халықпен ақылдасудың, олардың пікірімен санасудың белгісі деп ойлаймын. Сондықтан отбасыммен, бала-келін, немерелеріммен келіп, таңдауымызды жасадық, - дейді атақты геолог-барлаушы.
Бостан ауылының тұрғындары да референдумға келіп, өз таңдауын жасап жатыр. Олардың арасында тыл ардагері Алпамыш Жұмалиев те бар. Қария биыл 88 жасқа толды.
– Бүгін – ел үшін маңызды күн. Әр азамат жауапкершілікті сезініп, елдің болашағын айқындайтын маңызды шешімде бей-жай қалмауы тиіс. Еліміз тыныш, жұртымыз аман болсын, - деді Алпамыш Жұмалиев.
Жалпы Маңғыстау облысы бойынша 435 мыңнан астам дауыс беруші бар. Аймақта 250 референдум учаскесі жұмыс істеп жатыр. Қоғамдық маңызды шараны өткізуге 1 700 ден астам қызметкер жұмылдырылған. 250 учаскенің 238-і халықпен тікелей жұмыс істейді. Ал 12 жабық референдум учаскесінде ауысым қызметкерлері, тергеу изоляторындағы тұтқындар, ауруханадағы науқастар дауыс беруде.
