Скатов пен Шевченко Алматы турнирінің ширек финалына шықты

АЛМАТЫ. KAZINFORM - Қазақстандықтар Тимофей Скатов пен Александр Шевченко жұптық сында Алматыда алғаш рет өтіп жатқан ATP 250 турнирінің ширек финалына шықты.

Қазақстандық жұп алғашқы айналымда америкалықтар Эван Кинг - Риз Штальдерді жолдан тайдырды - 6:1, 7:6 (7:5).

Қазақстандықтар ширек финалда аргентиналық Гвидо Андреоцци - үндістандық Шрирамбалай Нараянасвами немесе аустралиялықтар Джеймс Дакворт - Александр Вукичтің қай жеңгенімен кездеседі.

«Тимофеймен бірге ойнай бермеймін. Ұйымдастырушылар бізге арнайы шақырту жіберді. Үмітті ақтай бастағанымызға қуаныштымыз. Барынша шебер ойнап, мықты жұпты жеңдік. Турнир барысында алға жылжуға толық мүмкіндік бар», - деді Александр Шевченко.

«Әлемдік жұптық рейтингіде біз жоғары тұрған жоқпыз. Соған қарамастан, қазақстандық жанкүйерлерді жеңістерімізбен қуантқымыз келеді. Соңғы рет Александрмен бірге 2021 жылы фьючерсте өнер көрсетіп, бірінші айналымда жеңіліп қалған едік. Бұл жолы жұптық және жекелей сында да биік мақсаттар қойып отырмыз», деді Тимофей Скатов.

Бүгін жекелей сында Бейбіт Жұқаев ливандық Бенжамин Хассанмен, А.Шевченко тағы бір қазақстандық Михаил Кукушкинмен шеберлік байқасады. Т.Скатов ертең чехиялық Томаш Махачпен кездеседі.

Еске сала кетейік, бұдан бұрын Путинцеваның Қытайдағы турнирде қарсыласын ойсырата жеңіп, екінші айналымға шыққанын жазған болатынбыз.