Жаслан Мәдиев OPEN AI мен Google-ге бәсекелес қазақстандық стартапты атады

АСТАНА. KAZINFORM – Мәжілісте Astana Hub пен Инновациялық технологиялар паркін біріктіру туралы заң жобасы бірінші оқылымда талқыланып жатыр.

Отырыста Цифрлық даму, инновациялар және аэроғарыш өнеркәсібі министрі Жаслан Мәдиев Astana Hub-тан қолдау көріп, халықаралық нарыққа шыққан инновациялық стартаптардың қазіргі жай-күйіне тоқталды.

- Astana Hub-та құрылған бизнес-процестер тиімді және үздік тәжірибелерге сәйкес жұмыс істейтінін көрсетті. Қазірдің өзінде 500-ге жуық резидент жылына 480 млн доллардың экспортын өндіреді. Инвестиция тартқан және ауқымды отандық табысты стартаптардың бірнеше мысалын келтіргім келеді, - деген министр Higgsfield генеративті жасанды интеллект моделінің әлеуетіне ерекше тоқталды.

- Бұл құрал мәтіндік сұраныс бойынша бейнелер жасайды. Стартап Кремний алқабының әйгілі венчурлық қорларында 16 миллион доллар инвестиция тартты. Қазіргі таңда ол OPEN AI және Google сияқты ірі технологиялық алпауыттардың өнімдеріне тікелей бәсекелес болып есептеледі, - деді Жаслан Мәдиев.

Айта кету керек, жыл басында Astana Hub резиденттерінің 90-нан астам елге IT-қызмет экспорттағаны белгілі болған еді.