«Жайық» командасы волейболдан Қазақстан чемпионы атанды
ОРАЛ. KAZINFORM — Орал қаласындағы «Жайық арена» спорт кешенінде волейболдан ерлердің ұлттық лига командалары арасында кезекті Қазақстан чемпионаты мәресіне жетті.
Биыл «Жайық» пен «Ақтөбе» командалары алтын жүлдені сарапқа салды.
Оралдық клуб «Конденсат» аталған кезде 1998 және 2014 жылы Қазақстан чемпионы атанған еді. Бірақ кейін «Конденсат» тарап кетті де, Оралда көпке дейін ұлттық лигада өнер көрсететін команда болмады. Тек 2023 жылы ғана «Жайық» ұлттық лигаға оралды. Ал сол жылы ұлттық лигаға қосылған «Ақтөбе» әзірге чемпион атанып көрмеген болатын.
Қазақстан ұлттық құрамасының бас бапкері Виктор Козик жаттықтыратын оралдықтар 2024 жылы жүлдесіз қалса, биыл тұрақты чемпионатты бірінші орынмен аяқтады.
Еліміздің жастар құрамасын да баптап жүрген Сергей Трикоздың шәкірттері 2024-2025 жылғы маусым барысында ел кубогы мен суперкубокты жеңіп алған еді.
Екі жеңіске дейін созылатын финал биыл аса тартысты өтті. Алғашқы кездесуде ақтөбеліктер 3:2 есебімен басымдылық танытса, екіншісінде оралдықтар қарымта қайырды — 3:2. Қос ойында матч тағдыры он партияда шешілді.
Шешуші, үшінші бәсекеде бірінші партия соңында «Жайық» капитаны Виталий Вориводин доп бергенде, оралдықтар сәтті түйіндеді — 25:19.
Екінші сетті Борис Кемпа эйспен бастап, оны Владимир Прокофьев, қуатты соққыларымен дараланған Виталий Эрдштейндер жалғастыра білді — 25:22.
Үшінші сет Айбат Неталин, Дамир Әкімов, Кирилл Костыленко сынды шебер ойыншылары бар ақтөбеліктердің пайдасына шешілді — 25:21.
Бірақ төртінші партияны «Жайық» жеңіспен тәмамдады — 25:21. Қорытынды есеп — 3:1.
Осылайша, оралдықтар чемпион атанса, «Ақтөбеге» күміс жүлде бұйырды.
Біріншілік соңында жеңімпаз-жүлдегерлер, үздік ойыншылар марапатталды.
- Биылғы чемпионат ерекше болды деп айта аламын. Біріншілік барысында жеңімпаз-жүлдегер кім болатынын болжау қиын еді. Өйткені алдыңғы жеті команда үміткер екендігін байқатты. Әсіресе, «Атырау» екінші, үшінші турдан кейін жетінші орында келе жатып, жарыс қорытындысында қола медальмен марапатталды. Үш күнге созылған финал өте тартысты болды. «Жайық» пен «Ақтөбе» құрамында да легионерлер бар, жаттықтырушылары да – белгілі мамандар. Керемет ойын өрнегін көрсеткені үшін қос командаға алғысымды айтамын, - деді Kazinform тілшісіне Қазақстан волейбол федерациясының вице-президенті Ермек Сырлыбаев.
Еске сала кетейік, бұдан бұрын волейболдан Қазақстан чемпионатында қола жүлде үшін бәсекеде «Атыраудың» есепті теңестіргенін жазған болатынбыз.
Сондай-ақ алтын үшін таласта «Жайық» клубы камбэкпен «Ақтөбені» ұтты.
