Жайықта су деңгейі көтеріліп, Атырау-Орал автожолында қозғалысқа шектеу қойылды

АТЫРАУ. KAZINFORM - Атырау облысындағы Жайық өзеніндегі су деңгейінің көтерілуіне байланысты А-28 Атырау-Орал автожолының 5-67 (Атырау қаласы-Махамбет аудан) шақырымы аралығында көлік қозғалысына шектеу қойылған.

Бұл туралы «ҚазАвтоЖол» кәсіпорны хабарлады.

«Қазіргі сәтте Атырау-Индер бағытымен балама жол арқылы қозғалыс қауіпсіздігі қамтамасыз етілді», - делінген хабарламада.

Осыған дейін Жайық өзенінің су деңгейі Атырау облысының 2 ауданында қауіпті белгіден асып кеткенін хабарлаған едік.

Жайық өзенінде су деңгейінің көтерілуіне байланысты Атыраудағы балалар ауылында кезекшілік қойылды.