Жексенбі күні Конституция күнін мерекелеуге байланысты автокөлік қозғалысы шектеледі
АСТАНА. Тамыздың 25-і. ҚазАқпарат /Гүлнар Жандағұлова/ - Тамыздың 30-ында Конституция күніне арналған мерекелік шаралар өткізуге байланысты елорданың орталық бөлігі мен «Қазақ елі" алаңы ауданында сағат 8-ден шаралар аяқталғанға дейін көлік құралдарының қозғалысы бірқатар учаскелерде шектеледі,
деп хабарлайды Астана жол полициясы басқармасының баспасөз қызметі.
Атап айтқанда, бұл мына даңғылдар мен көшелерге қатысты: Б.Момышұлы даңғылы - Тәуелсіздік дваңғылынан Сарайшық көшесіне дейін, Тәуелсіздік даңғылы - №42 көшеден Б.Момышұлы даңғылына дейін, Айнакөл көшесі - Ақжол көшесінен Тәуелсіздік даңғылына дейін, №41 көше - Сарайшық даңғылынан Тәуелсіздік даңғылына дейін.
Сарайшық даңғылы бойынша №-1 көпірде қозғалыс шектеліп, көліктер Орынбор көшесіне қарай бұрылып кетеді.
Көрермендерді мерекелік серуендер өтетін орынға жеткізу үшін жинау мына жерлерде болады: Республикалық ұлан, «Отан қорғаушылар» мемориалы, «Жастар» сарайы, К.Байсейітова атындағы опера және балет театры, «Астана» елордалық циркі, «Бәйтерек» монументі, орталық алаң және «Жас ұлан" республикалық мектебі, деп хабарлады баспасөз қызметі.
