Жетісуда Мемлекеттік рәміздер күніне арналған патриоттық шеру өтті
ТАЛДЫҚОРҒАН. KAZINFORM — Талдықорғандағы «Жастар» саябағынан басталған шеру Ж.Балапанов, Б.Әшімов көшелерімен жүріп өтіп, Талдықорған — Алматы тас жолының бойындағы 92 метр биіктікте орнатылған Мемлекеттік Ту тұғырына табан тіреді.
Шеруге қатысушылардың қолында жалаулар желбіреп, жастар өкілдері елдің бостандығы мен тәуелсіздігінің басты нышандары ретінде қолдарында 12 м х 6 м болатын МемлекеттікТу мен Мемлекеттік Елтаңбаны қоса алып жүрді.
300-ге жуық адам сап түзеген патриоттық шараға спортшылар, еріктілер, саяси партиялар, «Ұлы дала жорығы» марафонының жеңімпаздары, велосипедшілер, жас кадетшiлер, жастар, шығармашылық зиялы қауым қатысты.
Мемлекеттік Туды көтеру салтанатты рәсімі өтіп, Әнұран шырқалды.
Мерекелік іс-шара ту тұғырының жанында жалғасты. Концерттік бағдарлама ұсынылып, «Көк тудың желбірегені», «Байтақ далам», «Атамекен» патриоттық әндері орындалды.
