Жетісуда сот спортзалда қайтыс болған жас жігіттің ісін қарап жатыр

ТАЛДЫҚОРҒАН. KAZINFORM — Биыл 3 қаңтар күні Кербұлақ ауданы Талдыбұлақ ауылының тұрғыны Дидар Ешмұхамет ауыр дене жарақатынан кейін көз жұмды.  

Анасы Сұлушаш Сембаеваның айтуынша, ұлы сол күні кешке волейбол ойынын тамашалауға кеткен. Алайда бірнеше сағаттан кейін оның отбасы жас жігіттің қайтыс болғаны туралы хабар алады.

Ойын кезінде айыпталушы Дидарды спортзалдың киім ауыстыратын бөлмесіне шақырған. Бөлме қараңғы, әрі тар. Анасының пайымдауынша,шабуыл дәл сол жерде болған.

— Пышақ 15 сантиметрге еніп кеткен. Жарақатты қасақана салған. Барлық өмірлік ағзалары, соның ішінде жүрегі де зақымдалған. Бұл жарақаттан кейін тірі қалу мүмкін емес, — дейді ол.

Жәбірленушінің туыстарының айтуынша, қайғылы оқиғадан бірнеше күн бұрын жас жігіттер арасында жанжал туындаған. Олар 2025 жылы 30 желтоқсанында төбелескен.

Сотталушының айтуынша, оқиға болған күні олар қайтадан төбелесіп, ол Дидарды өлімші етіп ұрған. Алайда жәбірленушінің отбасы бұл түсінікпен келіспейді.

— Видеода олардың киім ауыстыратын бөлмеге бірге кіргені, ал біраз уақыттан кейін ол жалғыз шыққаны көрінеді. Бұл әдейі болды. Менің ұлым пышақ ұстағанын білмеді. Әйтпесе, өзін қорғауға болатын еді, — дейді Сұлушаш Сембаева.

Жәбірленуші тарап сол күні айыпталушыны мас күйінде көргенін айтады. 

Марқұмның әпкесі Ақбота бұл оқиғаны кісі өлтіру деп есептеп, іс 99-бап («Адам өлтіру») емес, Қазақстан Республикасы Қылмыстық кодексінің 106-бабы («Адам өліміне әкеп соқтырған денсаулыққа ауыр зиян келтіру») бойынша қаралып жатқанымен келіспейді.

— Біз бұлістің заң шеңберінде қатаң қаралуын сұраймыз. Сот отырысы Сарыөзекте өтіп жатыр, бірақ ол ауыстырылды — олар куәгерлердің барлығы келмей жатқанын алға тартты, — дейді ол.

Жетісу облыстық полиция департаменті сотқа дейінгі тергеу амалдары аяқталғанын хабарлады. Ведомствоның мәліметінше, қажетті тергеу әрекеттерінің толық кешені аяқталып, одан кейін қылмыстық іс пен айыптау актісі аудандық сотқа жолданды.

— Айыпталушы қамауда, ал тергеу департамент басшылығының ерекше бақылауында болды, — делінген хабарламада.

Қазір сот отырысы жалғасып жатыр. Марқұмның туыстары сот істің барлық мән-жайын жан-жақты бағалап, әділ шешім шығарады деп үміттенеді.

Бұған дейін Талғарда ер адам азаматтық некедегі жұбайын пышақтап өлтіргені туралы жаздық.