Жылыой ауданындағы елді мекендерді тасқыннан қорғау үш 3 деңгейлі бөгет салынды
АТЫРАУ. KAZINFORM – Атырау облысындағы Құлсары қаласы мен елді мекендерді Жем өзеніндегі тасқын судан қорғау үшін 3 деңгейлі бөгет салынған.
Атырау облысы әкімінің орынбасары Қайрат Нұртаевтың айтуына қарағанда, Жем өзенінің Жылыой аудағындағы арнасы 2,5 метрге тереңдетілген. Ал ені 50 метрге кеңейген.
– Біздің басты мақсатымыз – Жылыой ауданының орталығы – Құлсары қаласы мен елді мекендерді тасқын судан қорғап қалу. Жем өзенінің Ақкиізтоғайдан Тұрғызба ауылының аралығына дейінгі түбі, су айдынының Каспий теңізіне құятын сағасы тереңдетілді. Бұл шамамен 50 шақырымды құрайды, - дейді Қайрат Нұртаев.
Оның айтуынша, Жем өзенінің жағалауында 3 деңгейлі бөгет салынған. Оның ұзындығы – 100 шақырымға жуық.
– Біріншісі, Жем өзенінің түбін тереңдету кезінде алынған топырақпен төселді. Екінші, бөгет республикалық маңызы бар Атырау-Доссор-Бейнеу-Ақтау тас жолынан Ақкиізтоғай ауылына дейінгі 65 шақырым аумақта соғылып жатыр. Бөгеттің ені – 20, биіктігі – 6 метр. Жаңадан салынып жатқан бөгет әр 50 метр сайын нығыздалады. Қазір оның 78 пайызы аяқталды. Былтырғы көктемде Құлсары қаласын тасқын судан қорғау үшін бөгет салынған еді. Бұл – үшінші бөгет. Осы бөгет қайта нығайтылды. Биыл өзендегі тасқын су үш деңгейлі бөгеттен өтпейтініне сенімдіміз, - дейді Қайрат Нұртаев.
Облыстық құрылыс басқармасының басшысы Нұрберген Құсайыновтың мәліметінше, Құрсай өзегінің 46,1 шақырым түбін тереңдету көзделген. Осы кезге дейін өзектің Құлсары қаласына дейінгі бөлігі тереңдетілген.
– Қазір Құрсай өзегінің Құлсары қаласының аумағындағы бөлігін тереңдету қалып тұр. Соған байланысты Жем өзенінен Құрсайға құяр тұсы уақытша жабылды. Көктемгі тасқын су тек Жем өзені арқылы ағып жатыр. Су тасқыны кезеңі аяқталған соң Құрсай каналының Құлсары қаласындағы бөлігінің түбі тереңдету жалғасады. Өзеннің аталған каналға құятын тұсына су реттейтін үлкен шлюз орнатылады, - деді Нұрберген Құсайынов.
Еске сала кетелік, бұған дейін Жем өзенімен Жылыой ауданының аумағына келіп жатқан судың ағысы қатты екенін жазған едік.
