Жоғарғы Сот төрағасы толыққанды сот актілері банкін аяқтауды тапсырды

АСТАНА. ҚазАқпарат - Бүгін республика соттарының 2015 жылдың бірінші жартыжылдығында атқарған жұмыс қорытындыларына арналған кеңейтілген кеңесте ҚР Жоғарғы Сот төрағасы Қайрат Мәми толыққанды сот актілері банкін құруды аяқтауды тапсырды.

«Сарапшылардың соның ішінде шетелдік сарапшылар тарапынан сынға ұшырап келген және бір мәселе -толыққанды сот актілер банкінің жоқтығы. Бұл істі аяқтауды тапсырамын. Біз жұртшылыққа, ең бірінші кезекте мүдделі заңгерлер қауымдастығына қазақстандық әділсот жүйесінің ең озық сот тәжірибелерін қолдану мүмкіндігін ұсынуға тиіспіз», - деді Қайрат Мәми. Бұдан бөлек, Төраға сот құрылысының жаңа құрылымын құқықтық, ұйымдастырушылық және материалдық-техникалық тұрғыдан қамтамасыз ету бойынша шаралар қабылдауды тапсырды. «Департамент басшылары мен облыстық сот кеңсе басшыларына электрондық классификатордың үздіксіз жұмыс істеуін қамтамасыз етуді жүктеймін. Бұның бағдарламалық мазмұны жетілдірілуі шарт», - деді Қ. Мәми.