«Жол картасы» Оңтүстік Қазақстан үшін маңызды бағдарлама болып отыр
ШЫМКЕНТ. Қыркүйектің 2-сі. ҚазАқпарат /Татьяна Пылаева/ - Оңтүстік Қазақстан облысында «Жол картасы» бағдарламасы аясындағы 754 инвестициялық бағдарламаны жүзеге асыруға қарастырылған 25,7 миллиард теңгенің 15 миллиарды тамыздың 1-індегі жағдай бойынша игеріліп болды,
деп хабарлады Оңтүстік Қазақстан облысы әкімінің орынбасары Ерлан Айтаханов.
«Жол картасы» біздің облыс үшін адамдар мен елді мекендердің әлеуметтік-экономикалық проблемаларын шешудегі бірінші кезектегі маңызды бағдарлама болып отыр», - дейді Е.Айтаханов. Бағдарлама аясында 37 657 жаңа жұмыс орны құрылды, 7 мыңға жуық маман жұмыспен қамтылды. 5052 адам қайта мамандануға жіберілді. 13 мыңнан астам адам «Жастар тәжірибесі» бағдарламасы бойынша жұмысқа алынды.
Е. Айтаханов сондай-ақ, әкімдік ұйымдастырған «Оңтүстіктің игі істері» акциясы да үлкен өрлеу туғызғанын атап өтті. «Ардагерлерге, партия өкілдері мен үкіметтік емес ұйымдарға «Жол картасы» аясындағы жобаларды жүзеге асырудың нақты жетістіктері көрсетілді. Олар - мектептер, көпірлер, жаңа жолдар, өндірістік қуаттар және басқа да ондаған нысандар. Осының барлығын өз көздерімен көргендермен әңгімелескенде, адамдардың көңілдерінің көтеріңкі екенін сезбеу мүмкін емес», дейді әкімнің орынбасары.
