Жұбан Молдағалиевтің туған жерінде мәдениет үйі күрделі жөндеуден кейін қайта іске қосылды

ОРАЛ. Желтоқсанның 3-і. ҚазАқпарат /Ғайсағали Ералы/ - БҚО-ның Ақжайық ауданы Құрайлысай ауылында мәдениет үйі күрделі жөндеуден кейін қайта пайдалануға берілді.

Сондай-ақ ақиық ақын Жұбан Молдағалиевтің ескерткіші халықтың өтінішімен бұрынғы орнынан мәдениет үйінің алдына көшірілді, деп хабарлайды ҚазАқпарат тілшісі.

Аудан әкімі Абай Иманғалиевтің айтуынша, алдағы жылы Ж.Молдағалиевтің 90 жылдығы кең көлемде аталып өтілмек. Осыған орай оның туған жерінде дайындық жұмыстары жүргізілуде. Биыл Талап орта мектебіне де күрделі жөндеу жүргізілді. Мектепке, жергілікті ауруханаға су кіргізілді. Осының бәріне 124,9 млн. теңге жұмсалды. Ақын тойы қарсаңында Сайқұдық ауылындағы клуб пен кітапхана да жаңартылмақ. 

Қайтадан ашылған мәдениет үйінде жергілікті сазгер Жасталап Қуанғалиевтің шығармашылық кеші болды.