Жұмысқа қабылдау басталды: LRT жүйесіне қызметкерлер іріктеліп жатыр

АСТАНА. KAZINFORM – «City Transportation Systems» ЖШС Астанадағы жеңіл рельсті көлік (LRT) жүйесінде жұмыс істеу үшін қызметкерлерді қабылдау басталғанын хабарлады.

Компания мына лауазымдарға үміткерлер іздейді:

1. Станциялардың ауысым басшылары;

2. Станция кезекшілері;

3. Жылжымалы құрам орталығының қозғалыс диспетчерлері;

4. Жылжымалы құрам орталығының орталықтандыру бекетінің диспетчерлері;

5. LRT жабдықтары мен инфрақұрылымын басқару орталығының диспетчерлері;

6. Дабыл техниктері;

7. Байланыс техниктері;

8. Электр монтерлері;

9. Жол жөндеу учаскесінің шеберлері;

10. Жабдықтарды жөндеу слесарьлары;

11. Қойма меңгерушілері.

- LRT жүйесінде жұмыс істейтін болашақ мамандарды оқыту жұмыс беруші есебінен жүргізіледі. Теориялық және практикалық дайындық Қазақстанда және Қытай Халық Республикасында өтеді. Курстың ұзақтығы мамандыққа байланысты - 4-6 ай. Бағдарлама аяқталған соң қатысушыларға халықаралық үлгідегі сертификат табысталып, барлығы LRT бөлімшелеріне жұмысқа орналастырылады, - делінген ақпаратта.

Үміткерлерге қойылатын талаптар:

– көлік, машина жасау, электр техникасы немесе тиісті салалар бойынша жоғары немесе орта-арнаулы білім;
– кемінде 2 жыл жұмыс тәжірибесі.

Толық біліктілік талаптары cts.gov.kz сайтында жарияланған. Түйіндемелер осы сайт арқылы қабылданады.

Айта кетейік, Астанада LRT желісі Қосшыға қарай ұзартылады.