Зорлық-зомбылық мәселелеріне арналған деректі фильм түсірілді
АЛМАТЫ. Ақпанның 10-ы. ҚазАқпарат /Ернар Бекен/ - Бүгін Алматыда Орталық Азия елдеріндегі зорлық-зомбылық мәселелеріне арналған фильмнің тұсаукесері болды. Бұл «Орталық Азиядағы азаптау әрекеттерінің жолын кесу» жобасын қорытындылау кезінде көрсетілді,
деп хабарлайды ҚазАқпарат.Еуропалық Комиссия ұйымдастырған жоба Қазақстан, Қырғызстан және Тәжікстан елдерін қамтыған болатын. Аталмыш іс-шарада соңғы екі жыл ішінде жазықсыз азаптауды болдырмау мақсатында іске асқан жұмыстар, зорлық-зомбылықты жою бағытында мемлекеттік органдар мен құқық қорғаушылардың біріккен іс-әрекеттері, осы салада қалам тартқан журналистердің еңбектері туралы баян етілді. Осы жоба аясында аймақтағы зорлық-зомбылық мәселесін қозғайтын деректі фильм түсірілді. Онда билік өкілдерінен жазықсыз қысым көрген, түрлі зорлық-зомбылықтың құрбаны болған адамдардың, осындай келеңсіз жайттардың куәсі болған жандардың әңгімелері бар. Сондай-ақ фильмде осындай оқиғаға душар болған жағдайда қандай әрекеттер жасау қажеттігінен хабардар ететін мамандардың ақыл-кеңестері беріледі.
«Орталық Азиядағы азаптау әрекеттерінің жолын кесу» жобасының аясында Орталық Азия журналистерінің мақалалар топтамасы ұсынылды. Бұнда зорлық-зомбылық мәселелеріне арнап жазылған 250-ден астам материал бар.
