Әлия Бекешева Атырау облысы санитариялық-эпидемиологиялық бақылау департаментіне басшы болды
АТЫРАУ. KAZINFORM – Атырау облысы санитариялық-эпидемиологиялық бақылау департаментіне жаңа басшы тағайындалды. Енді бұл қызметті Әлия Бекешева атқаратын болды.
Атырау облысы әкімінің орынбасары Жасұлан Бисембиев жаңа басшыны ұжымға таныстырып, қызметіне сәттілік тіледі.
Әлия Аюпқалиқызы 1970 жылы Атырау облысында дүниеге келген. 1995 жылы Қарағанды мемлекеттік медициналық университетін гигиенист-эпидемиолог мамандығымен бітірген.
Еңбек жолын 1995 жылы Атырау қалалық санитариялық-эпидемиологиялық станциясының дәрігер-эпидемиологы болып бастаған.
1995-2013 жылдары Атырау қалалық мемлекеттік санитариялық-эпидемиологиялық қадағалау басқармасында дәрігер-эпидемиолог, санитарлық дәрігер, еңбек гигиенасы, тамақтану гигиенасы бөлімдерінің басшысы болған.
2013-2021 жылдары аралығында Атырау облысының санитариялық-эпидемиологиялық бақылау департаментінің бас маманы, бөлім басшысы лауазымында жұмыс істеген. Ал, 2021 жылдан осы тағайындауға дейін департамент басшысының орынбасары қызметін атқарды.
Еске сала кетелік, бұдан бұрын Қаһарман Мұсаев Атырау облысы Дін істері басқармасына басшы болғанын жазған едік.
