Барлық аймақта бір типтік үй салынады – Қанат Бозымбаев
Фото: Ақтөбе облысы әкімінің баспасөз қызметі
АҚТӨБЕ. KAZINFORM – Ақтөбе облысына жұмыс сапарымен ҚР Премьер-министрінің орынбасары Қанат Бозымбаев келді. Су тасқынынан зардап шеккен отбасылармен кездесіп, алдағы атқарылар жұмыс жайын айтты.
Ақтөбе облысында 1400-ден астам жер үй мен бау-бақша ұжымдарындағы 3 мыңнан астам үйге су кірді.
Фото: Ақтөбе облысы әкімінің баспасөз қызметі
«Жалпы айтқанда 4600-ден астам үйді жөндеу немесе салу керек. Бұл жұмысты қолға алу үшін облысқа келіп отырмын. Біраз үйлерді қарадым. Сонымен бірге осы сапарда «Верный капитал» КТ, ERG компаниялар тобы мен BI Grоup басшылары мен өкілдері келіп отыр. Олар негізінде үйлерді сатып алуға немесе салуға, жөндеуге тиісті қаражат бөліп жатыр. Ал бұзылған жол, көпір, электр торыбына қаржы бюджет есебінен төленеді. Қазір техникалық-экономикалық негіздеме, жобалық-сметалық құжатты сараптамадан өткізіп, Қаржы министрлігі арқылы қаржы бөлінеді. Тез арада үйлерді, пәтерлерді сатып аламыз немесе 2-3 айда жөндейміз, жаңа жер үйлер саламыз. Үш демеуші құрылыс, сатып алу, жөндеу үшін 27-30 млрд теңге бөледі», - деді ҚР Премьер-министрінің орынбасары Қанат Бозымбаев.
Вице-премьердің айтуынша, еліміз бойынша ауданы 80 шаршы метр болатын бір типті үйлер салынады деп жоспарланған. Алайда демеушілер көмегімен көпбалалы, мүгедектігі бар адамдарға өзгеше жағдай жасауға мүмкіндік бар. Бұл жұмысты жергілікті жерде облыс әкімдері үйлестіре алады.
Фото: Ақтөбе облысы әкімінің баспасөз қызметі
«Облыста 136 шақырым автомобиль жолдары, 15 көпір зақымданды. Сонымен бірге 23 әлеуметтік нысан мен 84 шағын және орта бизнес субьектісі зардап шекті. Жергілікті бюджеттен 7,8 млрд теңге бөлінді. Үйлерді қалпына келтіруге, тұрмыстық техника мен жиһаздың шығынын өтеу үшін 4,1 млрд теңге қарастырылды. Қазіргі таңда бағалау және техникалық тексеруден өткен үйлерге 600 млн теңге төленді. Сонымен бірге жедел көмек көрсету аясында 2700 отбасына 100 АЕК көлемінде 877 млн теңге біржолға төлем берілді», - деді Ақтөбе облысының әкімі Асхат Шахаров.
