ШҚО әкімі Қасым Қайсенов атындағы әскери бөлімді аралады
ӨСКЕМЕН. KAZINFORM – ШҚО әкімі Ермек Көшербаев ҚР Қорғаныс министрлігінің Халық қаһарманы Қасым Қайсенов атындағы «27943 әскери бөлімінде» болды. Бөлімдегі офицерлермен кездесіп, әскери техникаларымен танысып, даңқты батыр Қасым Қайсенов ескерткішіне гүл шоғын қою салтанатына қатысты.
Аймақ басшысы өз борышын өтеуге енді келген жас сарбаздармен тілдесті. Сондай-ақ арнайы жасақ арасындағы қоян-қолттық ұрыс шеберлерінің күресін тамашалады.
- Өңіріміздегі беткеұстар қаһармандардың, Екінші дүниежүзілік соғыс ардагерлерін ардақтау, ерліктерін дәріптеу – біздің парызымыз. Олардың атын ғана емес, жеңіс үшін жүріп өткен жолдарын да жатқа білуіміз керек, - деді облыс әкімі.
Бүгін дәл осы әскери бөлімде сонымен қатар Өскемен қаласындағы оқушылар мен студенттерге арналған ашық есік күні өтіп жатыр. Іс-шара өскелең ұрпақтың бойына патриотизмді баулып, еліміздегі Отан қорғаушылардың мәртебесін арттыру мақсатында ұйымдастырылды.
