ОРАЛ. Желтоқсанның 2-сі. ҚазАқпарат /Ғайсағали Ералы/ - Ақсай қаласында алдағы жылы ұлы ақын Абайға ескерткіш орнатылмақ.
Қазақстан халқы облыстық ассамблеясы төрағасының орынбасары Қуанышбай Төлебаевтың ҚазАқпарат тілшісіне хабарлағанындай, бұл шара ұлы ақынның 165 жылдығы қарсаңында Қазақстан халқы Ассамблеясы мүшелерінің бастамасымен, «Зерде-Память» қорының қатысуымен қолға алынып отыр. Оған өңірдегі кәсіпорындар қаржылай қолдау көрсетпекші.
Бір қолында қаламы, бір қолында кітабы, ойлы қалыпта отырған Абай бейнесін оралдық белгілі мүсінші Юрий Баймұқашев бастаған топ жасап шығармақшы. Ескерткіш Оралдағы «КазАрмаПром» АҚ-да құйылмақ.
Бұдан бұрын Батыс Қазақстанда Абай ескерткіші Орал қаласы мен Тасқала ауданы орталығында орнатылған болатын.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).