ОРАЛ. ҚазАқпарат - Бір жылдай күрделі жөндеуден өткен Бөрлі аудандық орталық мешіті қайта ашылды.
Тоқсаныншы жылдардың соңынан бері жөндеу көрмеген мешіттің іші қазіргі заманғы талапқа сай жөнделіп, бір мезгілде 200-ден астам адам намазға жығылатындай етіп кеңейтілді.
Қасиетті жұма күні мешіттің қайта ашылу рәсімінде аудан әкімі Марат Түсіпқалиев жиналғандарды құттықтап, Елбасымыздың саясатының арқасында Қазақстанда дінге де барынша көңіл бөлініп келе жатқандығын атап өтті. Алланың жердегі үйіне ағарту орталығы ретінде қарап, ата-бабамыздан қалған дәстүрлі дінді дәріптеу керектігін айтқан әкім мешітті қайта жөндеуге үлес қосқан жергілікті азаматтарға алғысын білдірді.
Салтанатты шарада сондай-ақ облыстық дін істері басқармасының басшысы Талғат Нығметов, Қазақстан мұсылмандары діни басқармасының БҚО бойынша өкіл имамы Руслан Сұлтанов ізгі тілектерін жеткізді. Содан кейін барлық жамағат жұма намазына қатысты.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).