Бұл - «Ұрпақ NEXT» жастар қоғамдық қорының Маңғыстау облысының жастары мен балаларының білім алуын, денсаулығын нығайту және әл-ауқатын жақсарту мақсатында «Мектепке дейінгі білім мен тәрбие» бағдарламасын жүзеге асыруы.
Аталған жобаның мақсаты - Ақтау қаласын қамти отырып, әлеуметтік жағдайы төмен отбасыларының 3-6 жас аралығындағы ерекше қажеттіліктері бар 40 баланы мектепке дейінгі білім мен тәрбие беретін орталықтарға орналастыру болып табылады.
«Біз «БОТА» қоғамдық қорының ұйымдастырған конкурсына қатысып, оның аз қамтылған отбасында тәрбиеленетін 3 пен 6 жас аралығындағы 40 балаға арналған мектепке дейінгі дайындық бағдарламасы бойынша грантын ұтып алған едік. Қордың «Әлеуметтік қызметтерді қолдау» бағдарламасының гранттық механизмдерін қолдана отырып, сондай-ақ қаржылай көмегі арқылы қазақ және орыс тілдерінде 5 топта балаларды оқыту жұмыстарын бастадық», - дейді «Ұрпақ NEXT» жастар қоғамдық қорының директоры Гүлжанат Мұратбай.
Ақтау қаласындағы №12 орта мектепте аталған жобаның ашылу салтанаты өтті.
Ақтау қалалық жұмыспен қамту және әлеуметтік бағдарламалар басқармасынан алынған тізім бойынша жағдайы төмен отбасыларда тәрбиеленіп отырған балапандар 7 ай бойы «Айналайын» балаларды дамыту орталығында білімдерін шыңдайтын болады.
Шара барысында балалардың оқу-құралдары, сөмке, кітап-дәптерлер салтанатты түрде табысталды.
«Ұрпақ NEXT» ЖҚҚ жоба үйлестірушісі Серікбаева Айзаданың айтуынша, жоба барысында балалар келесідей салалар бойынша оқытылатын болады: Балаларды мектепке дайындау; Балаларды ерте дамыту; Шығармашыл балалардың өнеріне қолдау көрсету; «Ата-аналар клубын» құру.
«Ұрпақ NEXT» жастар қоғамдық қоры 2005 жылы құрылған. Қор денсаулық, спорт, әлеуметтік орта, табиғатты қорғау, мәдениет және өнер, білім және ғылым салалары бойынша жеті бағытта жұмыс жасайды.