«Егемен Қазақстан» газетінің бүгінгі санында жазушы, Мемлекеттік сыйлықтың лауреаты Сәбит Досановтың мақаласы жарияланды. «Түнді қуған күндіздей шуақты сөз, ұлылықпен егіздей қуатты ой» атты мақалада жазушы ҚР Президентінің xалыққа Жолдауына қатысты өз ой-толғамдарымен бөліседі.
«Елбасы Нұрсұлтан Назарбаев биылғы Жолдауында еліміздің алдына дағдарысқа қарсы және құрылымдық жаңарулардың бес бағыты бойынша жүзеге асыратын міндеттер қойып, оны шешудің жолдарын да көрегендікпен көрсетіп берді. Бірінші. Қаржы секторын тұрақтандыру. Екінші. Бюжет саясатын оңтайландыру. Үшінші. Жекешелендіру және экономикалық бәсекелестікті ынталандыру. Төртінші. Жаңа инвестициялық саясаттың негіздері. Бесінші. Жаңа әлеуметтік саясат. Бұлардың бәрі де еліміз үшін ауадай қажет. Ең маңыздысы, Елбасы осы бес бағытта қалай жұмыс істеу керектігі мен оны шешудің тиімді жолдарын тайға басқан таңбадай айқындап, анық айтып берді», - дейді жазушы.
« Инвестициялық ахуал әлі де жақсарады » атты мақалада «Егемен Қазақстан» басылымы елдегі тікелей шетел инвестициялары нарығындағы мәселелерді көтерген.
«Орталық коммуникациялар қызметінде болған баспасөз мәслихатында «KAZNEX INVEST» АҚ басқарма төрағасы Борисбий Жангоразов еліміздің инвестициялық тартымдылығы әлі де жақсара түсетінін айтып, саладағы атқарылып жатқан жұмыстар жөнінде әңгімеледі», - делінген мақалада.
Мемлекет басшысының тапсырмасына орай, елімізге инвесторлардың еркін келуі үшін барлық жағдай қарастырылып жатқанына тоқталған басқарма төрағасы, қазіргі күнде Қазақстанда 140-тан астам инвестор өз ісін иіріп, кәсібін дөңгелетіп отырғанын айтты.
«Бәріңізге мәлім, Мемлекет басшысының тапсырмасы бойынша елімізде индустриялық-инновациялық даму бағдарламасы жүзеге асырылуда. Шетелдерден тікелей инвестициялар тарту осы бағдарламаның басым бағыттарының бірі. Бүгінгі әлемде қалыптасқан күрделі жағдайдан бәріміздің хабарымыз бар. Осыған қарамай, біздің еліміз шетелдерден инвестициялар тартуды аялдатпау мақсатында инвестициялық ахуалды жақсартуды әлі де жалғастыра бермек. Қазіргі уақытта Қазақстанда 140-тан астам инвестор жұмысын жүргізіп отыр. Олар жалпы сомасы 6 млрд. долларды құрайтын 150-ден астам жобаны жүзеге асырды, соның нәтижесінде 20 мыңнан астам жұмыс орны құрылған. Дәл бүгінгі күнде де индустриялық-инновациялық даму бағдарламасының шеңберінде шетелдік инвесторларды тарту ісі қызу жүріп жатыр», дедi ол.
***
«Айқын» газетінің бейсенбідегі санында «Әкімдер елмен етене араласуы тиіс» атты мақала оқырман назарына ұсынылды. Басылымның атап көрсетуінше, Астанада Ұлттық музейде Президент Жолдауын ақпараттық және сараптамалық сүйемелдеуді ұйымдастыру мәселелері бойынша өткен республикалық кеңесте ҚР Премьер-министрінің орынбасары Дариға Назарбаева Президент Жолдауын жүзеге асыру үшін Үкімет пен жергілікті атқарушы органдар тың серпіліске көшу керектігін xабарлаған.
Д. Назарбаеваның айтуынша, ол үшін билік өкілдерінен алдымен халықпен қарым-қатынасты ешбір кедергісіз, ашық әрі шынайы түрде жүргізу талап етіледі. Өз кезегінде шенеуніктер елмен етене араласып, Үкіметтің атқарып жатқан шаруасын түсіндіруі қажет.
- Кеше Үкімет Елбасының халыққа арнаған Жолдауын жүзеге асырудың Жалпыұлттық жоспарын қабылдады, - деді Дариға Нұрсұлтанқызы. - Жоспарда Жолдаудағы бес бағытқа айрықша басымдық беріліп отыр. Біріншіден, Үкімет пен Ұлттық банк дағдарысқа қарсы жоспарды іске асыру керек. Бұл 2016-2018 жылдарға арналған экономиканы тұрақтандырудың басты тетігіне айналады. Ендігіде оның жеке жоспары да дайын болып қалды. Дегенмен ең бастысы, мемлекеттік органдар Үкіметтің қолға алған шараларынан халықты кеңінен хабардар етуі тиіс.
Әсіресе, аймақтық әкімдер тұрғындарға түсінікті тілде насихаттағаны абзал. Әкімдіктер айналасына қарапайым адамның көзқарасымен қарауға міндетті. Қатардағы ел тұрғындары дүкендер мен емханаларды, мектептер мен автобустарға күн сайын шынайы өмірмен бетпе-бет келеді. Оларды қоғамдағы кемшіліктер әркезде де алаңдатады. Сондықтан да оларға ең алдымен экономикалық көрсеткіштер емес, басшылардың адами қарым-қатынасы, мәселесіне назар аударуы маңызды. Әкімдер халықтың күнделікті тұрмыстық түйткілін шешуге қол ұшын созса, олар биліктің дағдарысқа қарсы жұмыс істеп жатқандығын түсінеді.
***
Зерттеуші, тарихшы Берік Әбдіғалиұлы Алаш әскеріне қатысты бұрын-соңды еш жерде жарияланбаған тың деректерді көпшілік назарына ұсынды, деп жазады « Айқын » газеті бүгінгі басылымында. Ол елімізде Алаш әскеріне қатысты арнайы мақалалар жазылып, бірлі-жарымды зерттеулер қолға алынғанымен кешенді әрі түбегейлі ғылыми зерттеу жұмыстары жүргізілмегенін тілге тиек ете келіп, Алаш әскеріне қатысты деректерді іздестіруге мемлекеттің қолдауынсыз кірісіп кеткенін жеткізді. Оның айтуынша, Ресей мұрағаттарынан осыған дейін еш жерде жарық көрмеген тарихи құжаттар мен фотосуреттер және бейнематериалдар табылған.
- Біздің тарихымызда ақтаңдақтар көп. Алаш, Алашорда тарихында да ашылмаған, зерттелмеген тақырыптар жетерлік. Соның бірі - Алаш әскері. Өздеріңіз білетіндей, Алаш немесе Алашорда әскері бастапқыда «халық милициясы», «халық әскері», «Алаш әскері», «қазақ полкі» сынды әртүрлі атаулармен аталды. Бастапқы қолданыстағы «милиция» сөзінің астарында елдің тыныштығы мен қауіпсіздігін қорғайтын әскер ұғымы жатқаны анық. Бұған дейін Алаш әскерінің іс-қимылдарын 1917-1919 жылдар аралығында жарияланған материалдар мен солардың негізінде жазылған зерттеулер бойынша саралайтынбыз. Енді бұл тақырып нақты деректермен толығып отыр, - деді тарихшы.
Б.Әбдіғалиұлының сөзінше, Алаш әскері өте қиын заманда құрылған.
- Ғылыми-зерттеу барысында қазақ полктарының құжаттары, командирлердің тізімдері, қазақ офицерлерінің есімдері табылды. Сонымен қатар Алаш әскерінің құрылуына колчактардың ықпал еткендігіне қатысты деректер қолға түсті, - деді ол.
«Осыдан соң Б.Әбдіғалиұлы атақты атаман Дутовтың оққағарлары қазақ жігіттері болғанын растайтын бейнематериал табылғанын айтып, жиналғандардың назарына тарихи деректі ұсынды», - делінген «Алаш әскеріне қатысты тың дерек табылды» атты мақалада.
***
Қазақстанда қар барысының саны небәрі 130-ға жетеді. Егер алдағы 10-15 жылда олардың онсыз да аз популяциясын сақтау бағытында нақты шешімдер атқарылмаса, қар барысы біздің аумақта жойылып кетуі ықтимал, деп xабарлайды «Экспресс К» басылымы.
Бұл туралы Алматыда өткен баспасөз мәслиxатында Қазақстан географиялық қоғамының мүшесі Мағжан Сағымбаев мәлім етті.
«Қазақ географиялық қоғамы Зоология институтына демеушілік жасап келеді. Ол аталған жануарлардың миграциясын және тау-тастағы бағыттарын анықтау мақсатында зерттеушілерге 15 фотоқақпан бөліп отыр. Осылайша, қолда бар фотоқақпандардың саны 30-ға жетіп отыр. Сонымен бірге зерттеудің екінші кезеңінде ғалымдар спутниктік телеметрияны қолдана алады. Ілбістің бірнешеуіне GPS құрылғылар орнатылады. Ол өз кезегінде аңдардың қайда жүргендерін бақылауға мүмкіндік береді», - делінген «Казахстан теряет свой символ» атты мақалада.
Зоология институтының ғылыми қызметкері Алексей Грачевтің сөзі бойынша, қар барысын зерттеу және оның санын сақтап қалу ісі мемлекеттік қаржыландырумен қамтамасыз етілмеген.