12:55, 04 Сәуір 2009

Алаяқтығы үшін шетелдік азамат пен оның «көмекшісі» сотталды

ОРАЛ. Сәуірдің 4-і. ҚазАқпарат /Ғайсағали Ералы/ - Орал қалалық соты алаяқтықпен айналысқан Камерун азаматы мен оның «көмекшісін» бес жылға бас бостандығынан айырып,

мүлкін тәркілеуге үкім етті, деп хабарлайды ҚазАқпарат тілшісі. Камерундық Нана Френк Дак пен алматылық Райгүл Есенгелдинова Ташкентте танысады. Өткен жылдың жаз мезгілінде Френк пен Райгүл Оралға келіп, осында пәтер жалдап тұрады. Бірі шетелдік, екіншісі аудармашысы ретінде танысқан олар пәтер иесіне доллар жасап, өткізу жөніндегі «қызметін» ұсынады. Пәтер иесі мұны ҰҚК департаментіне жеткізеді. Көп ұзамай әлгі екеуі Алматыдан келген кәсіпкер ретінде танысқан ҰҚК департаменті қызметкеріне ақшаны қалай жасаудың тәсіліне дейін көрсетеді. Онымен бірнеше рет кездесіп, 50 мың доллар ақшасын қағып алмақ болады. Алайда ҰҚК департаменті қызметкерлерінің араласуымен жалған ақша жасап, байымақ болғандар әріге бара алмай, бұлтартпас айғақтармен қолға түсті.

Аймақ Қоғам

Ғайсағали Сейтақ

1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).