Шараға Қазақстанның жетекші жоғары оқу орындарының және ғылыми ұйымдарының өкілдері, таяу және алыс шетелдерден қонақтар қатысты. Жиында сөз сөйлегендер Қ.Оқаевтың Қазақстанның экономика ғылымына қосқан үлкен үлесін, университеттің құрылуы мен қалыптасуындағы зор рөлін атап өтті.
Университеттің бірінші проректоры, экономика ғылымдарының докторы Шолпан Әбділманованың айтуынша, Қаби Оқаев бүкіл өмірін білім беруге, экономика ғылымына арнаған көрнекті тұлға, ұлағатты ұстаз. Ол құрған ғылыми мектептің атақ-даңқы елімізден тыс жерлерге де кеңінен танымал.
«Ол негізгі қорлардың ұдайы өндірісі, негізгі капитал саласындағы ғылыми мектептің негізін салушы. Оның ұзақ жылдар бойы зор қажыр-қайратпен жасаған еңбектері көптеген заңнамалық актілер жасалымдарының негізіне алынды. Бүгінгі таңда отандық өндірісті қалпына келтіру, негізінен Қ.Оқаевтың әдістемелік ұсыныстары бойынша жүргізілуде», - деді Ш.Әбділманова.
Шара барысында өнер шеберлері концерт қойды, жоғары оқу орнының көркемөнерпаздары өз өнерлерін көрсетті.